काठमाडौं, नेपाल – नेपाल प्रहरी क्लब, भृकुटीमण्डपमा सम्पन्न ग्लोबल स्टार अवार्ड २०२५ एक अविस्मरणीय क्षणका रूपमा स्मरणीय बन्यो, जब एउटै परिवारका दुई पुस्ताले कला र सिर्जनामा छुट्टाछुट्टै विधामा सम्मान प्राप्त गरे।
संगीत क्षेत्रमा अतुलनीय योगदान पुर्याउँदै आउनु भएका वरिष्ठ गायक हरि कर्माचार्यलाई ‘ग्लोबल स्टार गायन सम्मान २०२५’ प्रदान गरिएको छ। त्यस्तै, सौन्दर्य र रचनात्मकताको क्षेत्रमा सक्रिय उनकी छोरी सदिक्ष्या कर्माचार्यलाई ‘उत्कृष्ट मेकअप आर्टिस्ट’ को रुपमा सम्मान गरियो।
हरि कर्माचार्यलाई ‘ग्लोबल स्टार गायन सम्मान २०२५’
नेपाली लोक, भजन, देशभक्तिपूर्ण तथा सामाजिक चेतनाले भरिएका गीतमार्फत नेपाली संगीत क्षेत्रमा उल्लेखनीय योगदान पुर्याएका वरिष्ठ गायक हरि कर्माचार्यलाई यो प्रतिष्ठित सम्मान प्रदान गरिएको हो।
उक्त समारोहमा पूर्व प्रधानमन्त्री झलनाथ खनाल, वरिष्ठ संगीतकार शम्भुजित बाँस्कोटा, संघीय सांसद डा. चन्द्र भण्डारी, पूर्वमन्त्री दिपेन्द्र श्रेष्ठ, राष्ट्रिय सभा सदस्य विष्णु कुमारी सापकोटा, तथा कार्यक्रम निर्देशक टेकराज पाण्डे लगायतका विशिष्ट व्यक्तित्वहरूले कर्माचार्यलाई सम्मानित गरे।
आयोजक संस्था दक्षिणा इन्टरटेन्मेन्ट तथा राज ब्यूटी एकेडेमीका तर्फबाट कर्माचार्यलाई बधाई दिइँदै भविष्यमा अझ ठूलो सफलताको शुभकामना व्यक्त गरिएको थियो।
सदिक्ष्या कर्माचार्यलाई ‘बेस्ट मेकअप आर्टिस्ट’ अवार्ड
त्यसै समारोहमा, सौन्दर्य र मनोरञ्जन क्षेत्रमा निरन्तर क्रियाशील रहँदै आएकी सदिक्ष्या कर्माचार्यलाई ‘ग्लोबल स्टार अवार्ड २०२५’ अन्तर्गत ‘उत्कृष्ट मेकअप आर्टिस्ट’ को सम्मान प्रदान गरिएको हो।
कार्यक्रममा संघीय सांसद डा. चन्द्र भण्डारी, पूर्वमन्त्री दिपेन्द्र श्रेष्ठ, राष्ट्रिय सभा सदस्य विष्णु कुमारी सापकोटा, तथा अन्य विशिष्ट अतिथिहरूको उपस्थिति रहेको थियो।
सदिक्ष्याको यो सफलतालाई नेपाली सौन्दर्य उद्योगका लागि प्रेरणादायी उपलब्धिका रूपमा हेरिएको छ। उनको सिर्जनशीलता र समर्पणले भविष्यमा थप नयाँ पुस्तालाई उत्प्रेरित गर्ने विश्वास लिइएको छ।
