काभ्रेपलाञ्चोक पनौती/ केहि दिन अगि पदीय जिम्मेवारी दुरुपयोग गरी संस्थाको रकम अपचलन गर्ने सामुदायिक बचत तथा ऋण सहकारी संस्था पनौतीका तीन कर्मचारी कारवाहीमा परेका छन् । संस्थाले अपचलन गरेको रकमको साँवा तथा ब्याज सहित असुल गरी संस्थाको विधान अनुसार बर्खास्त पछि कानूनी कारवाही शुरु गरेको छ ।
संस्थामा कार्यरत ऋण सहायक चौंथो तहका सुभाष सापकोटा, ऋण सहायक सुन्दर घिमिरे र सेवा केन्द्र प्रमुख विकास खड्कालाई पदीय जिम्मेवारी दुरुपयोग गरी रकम अपचलन गरेको अभियोगमा संस्थाले कारवाही गरी रकम असुल उपर गरे पछि जिल्ला प्रहरी कार्यालय काभ्रे र बागमती प्रदेश सहकारी विभागमा थप अनुसन्धान र कारवाहीका लागि जानकारी गराएको प्रमुख कार्यकारी अधिकृत मदन बस्नेतले जानकारी दिए । संस्थाले रकम अपचलन, अपचलन गर्ने कर्मचारी र उनिहरुका सम्वन्धमा भएका घटनाक्रमका बारेमा आज विज्ञप्ती प्रकाशन गरी जानकारी गराएको हो ।
