जाग्रेब । हरितालिका तीजको अवसरमा तीज धमाका २०८२ क्रोएसियाको राजधानी जाग्रेबमा भव्य रूपमा आयोजना हुने भएको छ । नेपाली संगीतप्रेमीहरूका लागि विशेष आकर्षणका रूपमा लोकप्रिय गायिका रचना रिमाल लाईभ गायनसहित उपस्थित हुने कार्यक्रम तय भएको आयोजक कोसेली प्रोडक्सनका व्यवस्थापन सम्हालिरहेका लामा ब्रदर्स ट्राभल्सका सञ्चालक सञ्जय तामाङले जानकारी दिएका छन् ।
कार्यक्रम आगामी अगस्ट ३१ तारिख आइतबारको दिन टिभोर्निका कल्चर युएल, पाभ्ला २, १०००० जाग्रेबमा हुने भएको छ । कार्यक्रम साँझ ५:०० बजेदेखि ११:०० बजेसम्म चल्नेछ । यस अवसरमा रचना रिमालसँगै अन्य कलाकारहरूको पनि बेजोड प्रस्तुति रहनेछ । चर्चित गायक बुद्ध लामा साथै अन्य कलाकारमा गायक दिपक तामाङ, निश्चल राई, शान्ति ओली, युवराज थापा, निरु परियार, कृष्ण काफ्ले, सुनिता बिक लगायतले आ-आफ्नो दमदार प्रस्तुति दिनेछन् ।
सांस्कृतिक कार्यक्रम, नृत्य, गायन र रमाइलो वातावरणले भरिपूर्ण तीज धमाका २०८२ कार्यक्रमले नेपाली समुदाय मात्र नभई स्थानिय संगीतप्रेमीलाई समेत आकर्षित गर्ने आयोजकले विश्वास व्यक्त गरेको छ । कोसेली प्रोडक्सनले सांस्कृतिक एकता, मौलिकता र मनोरञ्जनको संगमको रूपमा प्रस्तुत गर्ने बताएको छ । कार्यक्रम प्रत्यक्ष हेर्नका लागि साधारण टिकट १५ युरो र भिआपी टिकट ३० युरोमा खरिद गर्न सकिनेछ । टिकट सोही दिन कार्यक्रम स्थलबाट लिन सकिने आयोजकले जानकारी दिएको छ ।
क्रोएसियामा छरिएर रहनुभएका नेपाली प्रवासीहरूलाई छुट्टीको समयको सदुपयोग, नेपाली कलाकारसँगको सामिप्यता, सांस्कृतिक मनोरञ्जनको माहौलसँगै कार्यक्रम उत्सवमय बन्ने विश्वास आयोजकले लिएको छ ।
कार्यक्रम स्पोन्सर गर्न चाहनुहुने व्यक्ति तथा संघसंस्थाहरूले कोसेली प्रोडक्सनको टिमसँग समन्वय गर्न सकिने बताइएको छ । प्रोडक्सनको आधिकारिक नम्बरहरू +385-915882838, +385-976506715, +977-9818226103 मा ह्वाट्सएप मार्फत सम्पर्क गरि समन्वय गर्न आयोजकले सूचित गरेको छ । उल्लेखित नम्बरमा सम्पर्क गरि अग्रिम टिकट बुकिङसँगै थप जानकारी लिन सकिन्छ ।
