काभ्रेपलाञ्चोक / जिल्लामा आत्महत्या न्यूनीकरण तथा ब्यवस्थापन कार्ययोजना २०८१ तयार गरिएको छ ।जिल्ला प्रहरी कार्यालय काभ्रेपलाञ्चोकको आयोजनामा जिल्ला स्तरीय आत्महत्या न्यूनीकरण तथा ब्यवस्थापन अभियान समिति र जिल्ला स्तरीय कार्यदल गठन गरिएको छ ।
आर्थिक वर्ष २०८०/२०८१ मा मात्रै काभ्रेपलाञ्चोक जिल्लामा १ सय ३७ जनाले आत्महत्या गरेका छन् भने नेपालमा ६ हजार ९ सय ४८ जनाले आत्महत्या गरेका छन् । पछिल्ला ४ महिनामा आत्महत्या प्रयास गर्ने ४८ जना उपचार पछि घर फर्केका छन् ।
प्रहरी प्रमुख एसपी बसुन्धरा खड्काको अध्यक्षतामा सम्पन्न कार्यक्रममा जिल्ला स्तरीय आत्महत्या न्यूनीकरण तथा ब्यवस्थापन अभियान समितिको संयोजक प्रहरी प्रमुख एसपी बसुन्धरा खड्का र सल्लाहकार प्रमुख जिल्ला अधिकारी सुर्यप्रसाद सेढाई, सह संयोजक जनस्वास्थ्य कार्यालय काभ्रेका प्रमुख रागिश्री कक्षपति श्रेष्ठ रहेकी छन् ।
१७ सदस्यीय समितिमा जिल्ला स्थित सरकारी कार्यालयका प्रमुखहरु, स्वास्थ्य संस्थाका प्रमुखहरु, शिक्षा, गैसस, विभिन्न सामाजिक संघ सस्थाका प्रमुख तथा प्रतिनिधिहरु रहने छन् ।
जिल्ला स्थित कार्यदलको संयोजकत्वमा जनस्वास्थ्य कार्यालय काभ्रेका प्रमुख रागिश्री कक्षपति श्रेष्ठ संयोजक र जिल्ला अस्पताल मेथिन्कोटका प्रमुख सह संयोजक रहेका छन् । समितिमा विभिन्न संघ संस्थाका प्रतिनिधिहरु सदस्य रहेका छन् । समिति १५ सदस्यीय हुनेछ । त्यस्तै उक्त समिति स्थानीय तहमा स्वास्थ्य संस्थाका प्रमुखहरुको संयोजकत्वमा स्थानीय स्तरका विभिन्न संघ संस्थाका प्रतिनिधिहरु रहने गरी कार्यदल गठन हुनेछ भने वडा स्तरमा वडा स्तरीय स्वास्थ्य संस्थाका प्रमुखहरु संयोजक रहेको समिति गठन हुनेछ । पालिका र वडा स्तरमा प्रहरी कार्यालयका प्रतिनिधिहरु सदस्य सचिव रहने ब्यवस्था गरिएको छ ।
